Ferðasögur Hringsins: V hluti

 

Næsti áfangi í ferðalagsins var að þræða norðaustur strönd landsins. Frá Borgarfirði til Vopnafjarðar og þaðan yfir Melrakkasléttu og endað í Ásbyrgi. Vopnafjörður er fallegur bær í fögru bæjarstæði. Þokan lúrði við ströndina svo landslagið dulmagnað. Við stoppuðum ekki á mörgum stöðum en eftirminnileg er þó Hellisheiðin sem er afar hár fjallvegur og það var gaman að keyra uppúr þokunni og horfa á hana eins og dúnsæng fyrir  neðan sig. Þegar við keyrðum inní landið, í átt að Ásbyrgi hækkaði hitastigið um 15°.

Félagsfælnin dró okkur inní Vesturdal þar sem tjaldstæðið er fábrotnara en áreiðanlega mun fallegra en inní Ásbyrgi. Hljóðaklettar eru í nágrenninu og hin vatnsmikla Jökulá á Fjöllum hafa myndað mikið og geysifallegt gljúfur. Allir þeir sem gengið hafa Jökulsárgljúfur (frá Ásbyrgi að Dettifossi) geta vitnað um það að þetta er einstök náttúruperla.

Þegar við vöknuðum að morgni næsta dags var þoka en hlýtt. Við klæddum okkur í fyrsta sinn á þessu ferðalagi í yfirhafnir og stígvél og héldum í göngu um Hljóðaklettana. Eftir klukkutíma vorum við búin að tína af okkur allar spjarir og bjartur himinninn blasti við okkur.

 Eðalvagninn tryggi og troðfulli sem dró tjaldvagninn og bar fjallahjólin

Hellisheiði eystri 

Selárlaug

Skemmtileg sundlaug við bakka Selár eða eins og segir í bæklingnum "rómantískasta sundlaug landsins"

 Gönguferð um Hljóðakletta

 Fegurð Vesturdals 

 

Inní botni Ásbyrgis

Önd í Botnstjörn

Ferðasögur Hringsins: IV hluti

Borgarfjörður eystri

"Já, það hljómar vel." Var svarið þegar vinir okkar stungu uppá að við myndum hittast á Borgarfirði eystri. Við höfðum komið þar við fyrir mörgum árum síðan og heillast að náttúrunni. Það var líka kærkomið að komast úr þéttbýlinu á Héraði og almennilega útí sveit. Bakkagerði heitir bærinn sem stendur við fjörðinn og hefur yfir sér mikla reisn. Húsunum er vel við haldið og bæjarstæðið fallegt. Það var bónus að tjaldstæðið er við rætur Álfaborgar, meintu heimili Álfadrottningar Íslands...

Saman fóru tvær fjölskyldur; fjórir fullorðnir og börn á aldrinum; 1 árs, 2x 4ra ára, 6 ára og (korter í) 11 ára í 5 tíma göngu yfir fjallaskarð og niður í Brúnavík. Sólin skein og krakkarnir stóðu sig stórkostlega. Í ferðinni komst ég að því að blómið Bláklukka finnst einungis á Austurlandi. Austfirðir hafa verið útundan í landkönnun fjölskyldunnar hin síðari ár. Það verður bætt úr því á næstunni!

Borgarfjörður eystri hefur uppá ótal margt annað að bjóða en Bræðsluna ;o) 

Ferðasögur Hringsins: III. hluti

 

Atlavík er dýrðarstaður en nágrennið hefur margt uppá að bjóða. Við ákváðum að baða okkur í náttúrulaug við skála við Laugafell. Laugin er hlaðinn grjóti og svo falleg og umhverfið snyrtilegt að varla er hægt að kalla hana náttúrulaug. Á björtum degi sáum við Snæfellið blasa við, gullfallegt og tignarlegt fjall. Þar er víst óviðjafnanlegt útsýni.

Glorsoltin eftir miðdegissund var stoppað við Skriðuklaustur. Þar er rekin stórfenglegur matsölustaður. Húsið sjálft er skemmtilegt safn um Gunnar Gunnarson, eitt mesta skáld Íslendinga. Umhverfið allt ævintýralegt. Ég naut þess þó ekki fyrr en búið var að fylla magann af dýrindis kökuhlaðborði og drekka heitt kakó (!!!!).