Fallega Ameríka

Ameríka er engri lík. Hér býr heimskasta fólkið og það gáfaðasta. Fólk sem borðar djúpsteikt í hvert mál og fólk sem lifir heilsusamlegasta lífinu. Ameríka er nefnilega það stór að hún getur rúmað allan breytileikann.

jÍ þetta skiptið eru það ekki vinir mínir í Gap, Target, Macy´s eða hinir sem draga mig til sín heldur mögnuð náttúra sem finnst í þessu stóra landi. 

Við hjónakornin erum í villta vestrinu. Flugum til Denver í Colorado, sem er ný flugleið á áætlun Icelandair, og keyrðum af stað í vesturátt. Gistum fyrst í skíðabænum Vail, héldum áfram yfir Klettafjöllin og inní eyðimörkina í Utah. Í smábænum St. George áttum við heimboð hjá Piccetti hjónunum.

Hér er ægifögur náttúra. Við höfum heimsótt tvo þjóðgarða; Zion og Bryce canon og það er auðvelt að sjá fyrir sér indjánana sem bjuggu hér áður fyrr sem og kúrekana sem reyndu að hrekja þá í burtu. Hér eru líka mormónar... en það er önnur saga.

Áfram heldur ferðalagið okkar um kúrekalandið mikla. Í dag ætlum við að kíkja innfyrir fylkismörk Arizona þar sem við munum gista í nótt. Myndirnar hér fyrir neðan voru teknar í Zion þar sem við gengum á þennan myndarlega klett sem þeir kalla Angels landing. 

Mamma

Í dag er mæðradagurinn og því við hæfi að óska mömmum heimsins til hamingju. 

Eftir því sem árin líða verð ég stöðugt meðvitaðri á því hvað mamma mín er öflug kona og einstök.  Það er mikil gæfa að eiga foreldra sem styðja mann í gegnum lífið, hafa trú á manni og veita manni frelsi til að feta eigin braut.

Mamma mín var bara krakki þegar hún eignaðist mig. Ég fæ því að njóta hennar lengur. Einn daginn mun ég sjá hana þegar ég lít í spegil. Vonandi mun fylgja í kaupbæti styrkur hennar, æðruleysi, prjónafærni og bókhalds-áhugi...

Takk mamma!


ps. hér er linkur á pressupistil um dásemd þess að vera mamma ;o) 

20 ára Jubileum

 

Skrítin hefð að halda uppá útskriftarafmæli með nokkurra ára millibili. Fagna þeim tíma þegar sjálfsmyndin var brothætt. Hápunktur gelgjunnar. Svo endurupplifir maður tímann með fólki sem hefur tekið stökkbreytingu á liðnum árum... en samt hefur eiginlega ekkert breyst.

Í það minnsta þessa einu kvöldstund.  Tímahylki á 5 ára fresti...

Tæplega 100 krakkar úr hinu illræmda Efra-Breiðholti.

Mikið sem þau eru nú sakleysisleg að sjá á þessari bekkjarmynd. Á henni má finna verkfræðing, hjúkrunarfræðing, leikskólakennara, prentsmið, fegurðardrottningu, óperusöngvara, tölvuséní, gullsmið, kennara, hagfræðing, snyrtifræðing, viðskiptafræðing, hestaræktanda, doktor í sálfræði, fjölmiðlafræðing, sölumann... allt saman snillingar!!!

Það er svo merkilegt að mér finnst ég hafa gjörbreyst frá því að þessi mynd var tekin. Ekki bara vegna þess að á henni hef ég permanet í hárinu ;o) Ég hef alltaf staðið mig að því, á þessum endurfundum, að ráðskast með flest það sem skemmtuninni viðkemur, öfundað ungfrú Hólabrekkuskóla á hvað hún sé sæt og fengið fiðrildi í magann yfir sömu sætu strákunum.

Innan í þessari virðulegu húsfrú og móður býr nefnilega lítil freknótt gelgja sem mótaðist að mestu í hinu frábæra Breiðholti!

Að halda ræðu... eða að kynna... eða að vera formaður nemendaráðs... eða þurfti ég yfirhöfuð nokkra ástæður til að standa uppá sviði? Man allavega eftir aðskilnaðarkvíða við sviðið í sal skólans eftir að ég byrjaði í menntaskóla! Athyglissjúk? Ég? ...ekki séns!!!!

Með Önnu minni, Lilju og Eddu (sem lítur út eins og ítalskur flagari á myndinni)

Bíddu hver var að tala um gelgju?

Láttu hjartað ráða för

 
Sumir hafa hjartað á réttum stað. Aðrir eru hjartagull. Að fá steinhjörtu þykja slæm örlög í bókunum Elsku Míó minn og Bláa hnettinum. Ég ♥ Þig. Hjörtu sem slá í takt. Hjörtu tákna ást, væntumþykju, kærleika. 5 ára stelpur teikna hjörtu útí hið óendanlega og virðist seint eldast af þeim. 

Stundum er hjartað barmafullt af ást og aðra stundina þrungið harmi.


Allsstaðar má sjá eitthvað gott og fallegt, bara ef þú velur að koma auga á það. Það liggur þó misvel fyrir okkur að sjá fegurðina í umhverfinu og það góða í öðrum.


Sú sem tók þessar myndir hefur sérlega gott auga fyrir fegurðinni í umhverfi sínu og hinu góða í samferðarfólki sínu. Hún hefur hjarta úr gulli en fæddist með hjartagalla.

Þessi hjörtu í náttúrunni eru gott dæmi um að hið fallega og góða er allstaðar í kringum okkur, það eina sem þarf að gera er að koma auga á það. Það má líka yfirfæra það á tilfinninguna sem það táknar. Kærleikinn er allt um kring, það er okkar að koma auga á hann. Taka á við og gefa af okkur.   

Ekki bara vöðvi sem dælir blóði um líkamann. Heimili tilfinningalífsins

Taktu ákvörðun með hjartanu

Sjáðu með hjartanu 

Láttu hjartað ráða för

2 myndir

3. maí: Something I wore today

"Silkisloppinn" minn eignaðist ég á markaði í Hong Kong. Fyrst fannst mér markaðurinn vera sem lítið brot af himnaríki... eftir 2 klukkutíma var ég að ærast. Merkilegt hvað manns heitustu draumar geta stundum breyst í martraðir. Ég eignaðist nokkra dýrgripi á markaðnum. Hluti sem kostuðu ekki marga Latabæjarpeninga (ISK) en eru mér samt kærir. Sloppurinn er einn af þeim.

4. maí: Fun

Í kvöld er uppskeruhátíð í vinnunni. Akkúrat núna súpa ég á dísætu jarðaberjafreyðivíninu (skildi vera hægt að lesa í skapgerð og persónuleika eftir vali á drykkjum?) og bíð eftir að vinnufélagarnir mæti. Við munum borða saman og skála fyrir vel unnu verki. Þetta er gott fólk og vinnustaðurinn gerir mig að betri manneskju!

Lítil saga um trampólín

2. maí: Skyline

Sem metnaðarfull fyrirmyndar-húsmóðir dreymdi mig um að eiga almennilega hrærivél. Ég byrjaði að safna fyrir KitchenAid vél en það gekk hægt þar sem tekjur heimavinnandi kvenna eru fremur takmarkaðar. Því bölvaði ég heitt og innilega að hafa ekki, annað hvort hvatt fólk til að gefa okkur hrærivél í brúðargjöf, og  hins vegar að hafa ekki splæst í vél þegar góðærið var í hámarki.

Síðasta sumar ákvað ég að setja KitchenAid sjóðinn í trampólín... því þó mig dreymdi um himneskar pavlóvur og þriggja laga súkkulaðimús þá var draumur freknóttrar fimleikastelpu sterkari. Auðvitað lét ég sem hrærivél væri fórnað fyrir strákana mína en í raun og veru var trampólínið alveg fyrir mig... þó drengirnir mættu alveg nota það stundum ;o)

Í gær drógu þeir fram, með hjálp pabba síns, trampólínið og settu það á heiðursstað í garðinum. Rétt undir svefnherbergisglugga nágrannana.... við erum svooo vinsæl í hverfinu!

...já og hvað hrærivélina varðar, þá notaði ég restina úr sjóðnum til að kaupa KitchenAid hrærivél með langa sögu á Blandi seinna um sumarið.

Friður

Ég finn frið í sofandi börnum, útiveru, skort á dagskrá og góðum kaffibolla.
Mynd dagsins er af okkur Loga að lúra. Það er friður fyrir mér.

 1. maí: Peace

Fyrsti maí er friðsæll dagur. Var vakinn kl. 9.30 af mömmu sem var líklega meira hissa en ég að ná mér sofandi um þegar svo langt var liðið á morguninn. Við hittum ca. 12 sprækar Fjallaskvísur við rætur Úlfarsfells sem við þrömmuðum svo uppá. Þegar heim var komið fengum við okkur hádegismat og stukkum á nýuppsett trampólínið.

Það var því kærkomin hvíld og friður að leggjast uppí rúm með mjúkum litlum Bangsa-Baldri og loka augunum...